పిళ్లా సాయికుమార్: buruju.com : అమరావతి రాజధానిగా ఉన్నట్లైతే బౌద్ధం ద్వారా పలు దేశాలతో సాంస్కృతిక సంబంధాలను పెంపొందించుకోవచ్చనే జర్నలిస్టు అభిప్రాయం.. ఆంధ్రప్రదేశ్ వ్యవసాయ శాఖ మంత్రిగా వ్యవహరించిన కురసాల కన్నబాబుకు చాలా ఆగ్రహాన్ని తెచ్చిపెట్టింది. ‘‘చూడండి అధ్యక్షా.. అమరావతి రాజధానిగా ఉంటే చైనాతో యుద్ధాలను ఆపేయవచ్చట’’ అంటూ 2020, జనవరి 20వ తేదీన శాసన సభలో ఆయన చాలా సేపు వ్యంగ్యాస్త్రాలను సంధించారు. అప్పటికి మంత్రిగా ఉన్న కన్నబాబు మాటలు.. ముఖ్యమంత్రి జగన్ మోహన్ రెడ్డిని ఆహ్లాదపరిచి.. ఆయన ప్రసంగిస్తున్నంత సేపు నవ్వుతూ కనిపించారు. అధికార పార్టీకి చెందిన కొందరు సభ్యులూ హేళన చేశారు. కన్నబాబు ప్రస్తావించిన అంశాలు 2020, జనవరి 18వ తేదీన ‘ఈనాడు’ పత్రికలో నాలుగో పేజీలో నేను రాసిన వ్యాసంలోనివి. ఆ వ్యాసాన్ని ‘ఈనాడు’ యాజమాన్యమే రాయించినట్టుగా కన్నబాబు చెబుతూ.. మధ్యలో మాజీ ముఖ్యమంత్రి చంద్రబాబునూ దీనిలోకి తెచ్చారు. వ్యాసంలోని కొన్ని పేరాలను ఆయన సభలో చదివి వినిపించారు. పరిపాలనా రాజధానిని విశాఖపట్నానికి తరలించాలని నిర్ణయించిన వారికి అమరావతి గురించి ఏమి చెప్పినా నచ్చకపోవటం సహజమే. అందుకు ఒక జర్నలిస్టు సొంత అభిప్రాయాన్ని సైతం సహించలేకపోవటమే ఆశ్చర్యపర్చే విషయం.

‘ఈనాడు’లో.. 2020, జనవరి 18వ తేదీన వెలువడిన వ్యాసం

అమరావతి పూర్వనామం ధాన్యకటకం. సాక్షాత్తూ బుద్ధుడే అక్కడ నడయాడాడని దేశ,విదేశీ బౌద్ధ అభిమానులు ఎందరో భావిస్తూ దాన్నొక అత్యంత పవిత్ర స్థలంగా పరిగణిస్తారు. ఎంతో ప్రాధాన్యతను కలిగి ఉన్న అమరావతిలో రాజధాని నిర్మాణ ప్రక్రియ ప్రారంభమైనందున దాన్ని కొనసాగించుకొంటే వచ్చే ప్రయోజనాలు ఏరీతిలో ఉండేదీ ఒక కొత్త కోణంలో ఆవిష్కరించిందే ‘ఈనాడు’లో ‘ భవితకు బాసటగా ఘనచరిత్ర’ శీర్షికతో వెలువడిన వ్యాసం. రాజధాని అమరావతిలో ఉన్నట్లైతే బౌద్ధాన్ని అభిమానించే దేశాలతో సాంస్కృతిక వారధిని ఏర్పాటు చేసుకొని.. అక్కడి పెట్టుబడిదారులను ఆకట్టుకోవటానికి వీలవుతుందనే అభిప్రాయం వ్యాసంలో ఉంది. అంతే తప్ప కన్నబాబు అసెంబ్లీలో విమర్శించినట్టుగా.. అమరావతి రాజధానిగా ఉంటే చైనాతో యుద్ధాలను ఆపవచ్చనే అంశం వ్యాసంలో ఎక్కడా లేదు. లేని విషయాన్ని మంత్రి ప్రస్తావించారు కనుక బౌద్ధం ద్వారా చైనా ఎటువంటి దౌత్యాన్ని నెరపుతుందో ఇప్పుడు చూద్దాం.

అమరావతిలో.. 2006, జనవరిలో 13 రోజుల పాటు నిర్వహించిన కాలచక్ర క్రతువుకు దేశ,విదేశాల నుంచి హాజరైన బౌద్ధులు

బౌద్ధులు ఎక్కువగా గల వివిధ దేశాల్లో బౌద్ధం పేరుతో తిష్టవేసే పన్నగాలు చైనా పన్నుతూనే ఉంది. నేపాల్ దేశంలోని రాజకీయాలను శాసించేందుకు బౌద్ధాన్నీ బాగా వినియోగించుకొంటోంది. బుద్ధుని జన్మ స్థలంగా ప్రాచుర్యంపొందిన ‘లుంబినీ’ని అభివృద్ధి పర్చటానికని అక్కడ అడుగుపెట్టింది. నేపాల్.. చైనా అండదండలతో భారత్ పైనే కాలుదువ్వే పరిస్థితి వచ్చింది. చైనా తన వద్ద గల బుద్ధుని దంతంతో తరచు థాయిల్యాండ్ తదితర దేశాల్లో ప్రదర్శనలను నిర్వహిస్తూ అక్కడి వారి అభిమానాన్ని చూరగొనే ప్రయత్నాలు చేస్తోంది. చైనా సామ్రాజ్యవాద పోకడలను ఇటువంటి దౌత్యం కొంత తేలిక చేసి చూపించేందుకు వీలవుతోంది. బౌద్ధం ద్వారా విదేశాలతో దౌత్యం నెరపాలనే విధానం నెహ్రూ హయాం నుంచీ ఉన్నప్పటికీ నరేంద్ర మోదీ ప్రధాని అయ్యాకనే అది మరింత పెరిగింది. ఆయన తొలిసారి ప్రధాని కాగానే బుల్లి దేశమైన భూటానును సందర్శించటానికి కారణం.. అది బౌద్ధ దేశం కావటమే.

‘ఈనాడు’ పత్రికలో 15 ఏళ్లకు పైగా పనిచేసి.. వ్యవసాయ శాఖ మంత్రి హోదాలో అదే పత్రికను.. శాసన సభలో వ్యవసాయ శాఖ మంత్రి హోదాలో విమర్శిస్తున్న కన్నబాబు

భారత దేశంలో అనేక బౌద్ధ క్షేత్రాలు ఉన్నప్పటికీ.. ఒకప్పుడు రాజధానిగా భాసిల్లి, అద్భుత స్తూపం, శిల్పసంపదలతో ఆపార చరిత్ర కలిగి ఉన్న అత్యంత ప్రాధాన్యం కల ప్రాంతం.. అమరావతి Amaravati. అక్కడ 2006, జనవరి నెలలో 13 రోజుల పాటు నిర్వహించిన ‘కాలచక్ర’ క్రతువుకు నేను హాజరయ్యాను. దేశ,విదేశాల నుంచి వేల సంఖ్యలో బౌద్ధ బిక్షువులు కాలచక్రలో పాల్గోన్నారు. 14వ దలైలామా స్వయంగా ఈ క్రతువును నిర్వహించారు. అమరావతి రాజధానిగా ఉన్నట్లైతే.. జపాన్ వంటి దేశాలు తప్పక ఇటువైపు దృష్టి సారిస్తాయి. ఇప్పటికే దేశంలోని వివిధ చోట్ల గల బౌద్ధ క్షేత్రాల అభివృద్ధికి జపాన్ , మరికొన్ని దేశాలు సాయాన్ని అందిస్తూనే ఉన్నాయి. ప్రధాన మంత్రి నరేంద్ర మోదీ 2022, మే నెలలో నేపాల్, జపాన్ దేశాల్లో పర్యటించి బౌద్ధ వారసత్వాన్నే ప్రధానంగా ప్రస్తావించారు. జపానుతో పూర్వకాలం నుంచి గల సంబంధాలపై అక్కడి ఒక పత్రికలో మోదీ ఒక వ్యాసాన్ని సైతం రాశారు. రాజకీయ, యుద్ధ తంత్రం ద్వారా చేయలేని కొన్ని పనులను బౌద్ధమనే దౌత్యం ద్వారా చేయవచ్చని చెప్పే ‘ఈనాడు’ వ్యాసంపై అప్పట్లో మంత్రిగా పనిచేసిన కన్నబాబుకు బోలెడు అభ్యంతరాలు వచ్చేశాయి. కొన్ని రాష్ట్రాల సమాహారమే దేశం. అటువంటి దేశం ఇతర దేశాలతో మంచి సంబంధాలను కొనసాగించటంలో రాష్ట్రాల పాత్రా ఉండాలి. అమరావతి రాజధానిగా ఉన్నట్లైతే అటువంటి సంబంధాలు మరింత పటిష్ట పడేందుకు వీలవుతుందనే విశ్లేషణ నా వ్యాసంలో ఉంది. మొత్తం మీద కన్నబాబు నా వ్యాసంలోని అంశాలను విమర్శించినప్పటికీ.. బౌద్ధం ద్వారా దౌత్యం నెరపటానికి అమరావతి ఉపయోగపడుతుందనే ఒక కొత్త కోణానికి శాసన సభ ద్వారా ప్రాచుర్యం కల్పించినందుకు ఆయనకు ధన్యవాదాలు తెలిపాను.