బురుజు.కాం Buruju.com: Hyderabad: ఇప్పటికి 45 ఏళ్ల క్రితం భారత ప్రధాన మంత్రిగా పనిచేసిన మురార్జీదేశాయ్ Morarji Desai 99 ఏళ్ల పాటు జీవించి 1995లో కన్నుమూశారు. రోజూ తన మూత్రాన్ని తాను సేవించటమే తన ఆరోగ్య రహస్యమంటూ పలు సందర్భాల్లో ఎటువంటి సంకోచం లేకుండా ఆయన వెల్లడించటం అప్పట్లో ప్రపంచ వ్యాప్తంగా తీవ్ర చర్చనీయాంశమయ్యేది. ‘మూత్ర పానం చేసి జీవించటం కంటే మద్యపానం చేసి మరణించటం మిన్న’ అంటూ అప్పట్లో మహాకవి శ్రీశ్రీ Sri Sri దెప్పి పొడిచారు. మురార్జీ చెప్పినదాంట్లోని వాస్తవాలపై ఇంతవరకు శాస్త్రీయ పరిశోధనలంటూ ఏవీ జరిగిన దాఖలాలు లేకున్నప్పటికీ అయిదు వేల ఏళ్ల క్రితమే మనిషి మూత్రాన్ని వైద్యానికి వాడినట్టు ఆయుర్వేద నిపుణులు చెబుతున్నారు. మురార్జీ దేశాయ్ 30వ వర్ధంతి సందర్భంగా Buruju.com అందిస్తున్న కథనం ఇది .

మరికొందరు ప్రతినిధులతో ఉత్సాహంగా మొరార్జీ దేశాయ్

భారత ప్రధానిగా మురార్జీ దేశాయ్ (జనతా పార్టీ) 1977 నుంచి 1979 వరకు దాదాపు రెండున్నర ఏళ్ల పాటు పనిచేశారు. ఆయన ఫిబ్రవరి 29వ తేదీన లీప్ LEAP తేదీన జన్మించటంతో మిగతా వారికిలా ఏటా కాకుండా నాలుగేళ్లకోసారి ఆయన పుట్టిన రోజు వచ్చేది. పుట్టిన రోజు విషయంలో విశేషాన్ని సంతరించుకొన్న ఆయన తన దైనందిన పద్దతుల ద్వారాను అంతర్జాతీయ పత్రికలకు ఎక్కుతుండేవారు. ఆయన వివిధ సందర్భాల్లో వెల్లడించిన అభిప్రాయాలను క్రోడీకరిస్తే ఆయన చెప్పిన అంశాలు ఇలా ఉన్నాయి.. ‘‘ నేను రోజు ఉదయాన్నే ఖాళీ కడుపుతో నా మూత్రాన్ని 5 నుంచి 8 ఔన్సుల మేరకు (ఓన్సుకు 28 గ్రాములు) తాగుతాను. దానిని నేను జీవమిచ్చే నీరుగా అభివర్ణిస్తాను. పలు జంతువులు వాటి మూత్రాన్ని అవి తాగుతుంటాయి. కొన్ని ప్రాంతాల్లోని తల్లులు తమ పిల్లలకు కడుపు నొప్పి వచ్చినప్పుడు వారి మూత్రాన్ని పడుతుంటారు. మూత్రాన్ని సేవించటం మొదలు పెట్టిన కొద్ది రోజులకే శరీరం శుద్ధవుతుంది. మూత్రం రంగు, వాసన, రుచి లేకుండా ఉంటుంది. మీ శరీరం శుద్దయ్యాక మీరు గొప్ప అనుభూతిని పొందుతారు’’ అని మురార్జీ దేశాయ్ Murarji Desai వివరించారు.

ప్రాచీన కాలంలో మహర్షులు మూత్రానికి చాలా ప్రాధాన్యం ఇచ్చినట్టు ఆయుర్వేద నిపుణులు చెబుతుంటారు. ప్రాచీనులు రాసిన ‘డామరతంత్రము’ గ్రంథంలో అద్భుతమైన స్వమూత్ర చికిత్స విధానాలు లిఖించి ఉన్నట్టు ‘అందరికీ అయుర్వేదం’ 2008 నాటి పత్రిక వెల్లడించింది. ‘‘ వాడు విరిగిన వేలు మీద మూత్రం కూడా పోయడు’’ అనే నానుడి తెలుగులో ఉండేది. అంటే మూత్రాన్ని పూర్వం వేళ్లు తదితరాలు విరిగినప్పుడు పైన మర్ధనా చేయటానికీ వినియోగించేవారని భావించవచ్చు. మూత్రాన్ని ఎక్కువగా తాగితే కడుపులో సమస్యలు వస్తాయని వైద్యులు చెబుతున్నట్టు కొన్ని పత్రికలు పేర్కొంటున్నాయి.

చైనాలో ఒక రిటైర్డు ప్రొఫెసరు మూత్రాన్ని తాగుతుండగా ఆశ్చర్యపోతూ చూస్తున్న యువతీయువకులు. అక్కడ మూత్రం సంప్రదాయక ఔషధంగా ఉన్నట్టు పత్రికలు తెలిపాయి. చైనాలో దాదాపు ఒక లక్షమంది మూత్రాన్ని సేవిస్తున్నట్టు కొన్నేళ్ల క్రితం గ్లోబల్ టైమ్స్ పత్రిక రాసింది

మురార్జీ దేశాయ్ మూత్ర సేవనాన్ని అప్పట్లో ప్రజలు రకరకాల వ్యంగ్యోక్తులతో హేళన చేసేవారు. మూత్రం తాగి బతకటం కంటే మద్యాన్ని తాగి చనిపోవటం ఉత్తమమంటూ అప్పట్లో మురార్జీ విధానంపై మద్యపాన ప్రియుడైన మహాకవి శ్రీశ్రీ తనదైన శైలిలో వ్యాఖ్యానించారు. జిన్ను అనే మద్యం స్పురణకు వచ్చేలా మొరార్జీకి ఏకంగా ‘ మొరార్జిన్ను ‘ అనే పేరు కూడా పెట్టాడు. కొంత మంది ‘మురార్జీ కోలా’ అని వ్యవహరించారు. మూత్రం ఎటువంటి ఖర్చు లేకుండా లభించే దివ్యమైన ఔషదమని ఆయుర్వేద నిపుణులు చెబుతున్నందున దీనిపై శాస్త్రీయమైన పరిశోధనలు అవసరం. గోమూత్రాన్ని పలువురు ఔషధకారిగానే కాకుండా పవిత్రమైనది గాను పరిగణిస్తూ సేవిస్తుంటారు. మనిషి మూత్రానికి కూడా అంతటి మహత్తు ఉందా? లేదా? అనేదే ఇప్పుడు తేలాలి.