బురుజు.కాం Buruju.com : Hyderabad: తెలంగాణలోని గ్రామ పంచాయతీ కార్యదర్శుల సమస్యలు త్వరలో పరిష్కారమయ్యే సూచనలు కనిపిస్తున్నాయి. వీటిపై ఇప్పటికే ముఖ్యమంత్రి రేవంత్ రెడ్డి కార్యాలయం నుంచి పంచాయతీరాజ్ శాఖ కార్యదర్శికి ఒక దస్త్రం చేరింది. మరో వైపు.. కార్యదర్శుల అన్ని విజప్తులను పరిశీలించి వాటిలో తన స్థాయికి చెందిన వాటిని త్వరలోనే కొలిక్కి తెస్తామని తనను కలసిన కార్యదర్శుల సంఘం ప్రతినిధులకు కమిషనర్ అనితా రామచంద్రన్ వెల్లడించారు. అదే శాఖకు చెందిన కార్యదర్శి లోకేశ్ కుమార్ కూడా సానుకూల ధోరణి కనబర్చారు.

అక్టోబరు 24న ముఖ్యమంత్రిని కలిసిన సంఘ నాయకులు

రాష్ట్రంలో ప్రస్తుతం ఒక్కో పంచాయతీకి ఒక్కో కార్యదర్శి చొప్పున ఉన్నప్పటికీ కొన్ని ఇబ్బందులు మాత్రం చాలా కాలంగా అపరిష్కృతంగా ఉన్నాయి. ఇటువంటి నేపథ్యంలో ముఖ్యమంత్రి రేవంత్ రెడ్డి 2024, అక్టోబరు 24వ తేదీన ఉద్యోగుల సంఘాల జేఏసీ చైర్మన్ మారం జగదీశ్వర్, సెక్రటరీ జనరల్ ఏలూరి శ్రినివాసరావుల ఆధ్వర్యంలో వివిధ సంఘాల నాయకులతో భేటీ అయినప్పుడు కార్యదర్శుల సమస్యలను కూడా తెలుసుకొన్నారు. రాష్ట్ర పంచాయతీ కార్యదర్శుల సంఘం (టి.పి.ఎస్.ఎ) అధ్యక్షులు పి. మధుసూదన్ రెడ్డి.. ఆనాటి భేటీలో ప్రధాన సమస్యలను సీఎంకు వివరించగలిగారు. ఆయన చెప్పిన అంశాలను అదే భేటీకి హాజరైన అధికారులతో పాటు ముఖ్యమంత్రి సైతం నమోదు చేసుకోవటం విశేషం. అనంతరం ఆయా అంశాలు, సంఘ ప్రతినిధులు అందజేసిన వినతి పత్రాన్ని క్రోడీకరించి రూపొందించిన దస్త్రం సీఎం కార్యాలయం నుంచి పంచాయతీరాజ్ కార్యదర్శి కార్యాలయానికి చేరినట్టు సంఘ నాయకులకు సమాచారం అందింది.

అక్టోబరు 30వ తేదీన సచివాలయంలో కార్యదర్శుల సంఘ నాయకులు

ముఖ్యమంత్రి కార్యాలయం నుంచే అధికారులకు ఒక దస్త్రం వెళ్లటంతో ఆయా అధికారులను కూడా కలసి ప్రధాన సమస్యలను స్వయంగా వివరించాలని సంఘ నాయకులు నిర్ణయించారు. ఇందులో భాగంగా అక్టోబరు 30వ తేదీన అధ్యక్షులు మధుసూదన్ రెడ్డి నేతృత్వంలో ప్రధాన కార్యదర్శి ఇ.శ్రీనివాస్, ఉపాధ్యక్షులు కె.సతీష్ కుమార్, సుదర్శన్, కార్యనిర్వాహక కార్యదర్శి కె.అరుణ్, సంయుక్త కార్యదర్శి వి.కవిత, లక్ష్మి నారాయణ తదితరులు హైదరాబాదులో ఉన్నతాధికారులను కలిసి మరో సారి వినతి పత్రాలను అందజేశారు. రాష్ట్ర ప్రభుత్వ ప్రధాన కార్యదర్శి శాంతికుమారి క్యాంపులో ఉండటంతో ఆమె కార్యాలయంలో వినతి పత్రాన్ని అందజేశారు. అనంతరం పంచాయతీ రాజ్ కార్యదర్శి లోకేశ్ కుమార్ , ఆ తర్వాత కమిషనర్ అనితా రామచంద్రన్ వద్దకు వారు వెళ్లి సమస్యలను వివరించారు. వినతి పత్రంలోని ఒక్కో అంశంపైనా కమిషనరు అనితా రామచంద్రన్.. సంఘ నాయకుల వివరణలను తెలుసుకొన్నారు. వీటిలో ప్రభుత్వ స్థాయిలో పరిష్కరించాల్సిన వాటిపై సచివాలయానికి నివేదిస్తామని, మిగతా వాటిపై తాము చర్యలు తీసుకొంటామని ఆమె వెల్లడించారు. కార్యదర్శి, కమిషనరు నుంచి సానుకూలత వ్యక్తం కావటంతో నాయకులు సంతోషాన్ని వ్యక్తం చేశారు.

ముఖ్యమంత్రికి, అధికారులకు అందజేసిన వినతి పత్రంలో 21 అంశాలను సంఘ నాయకులు పొందుపర్చారు. వాటిలో ప్రధానమైని ఇలా ఉన్నాయి.. ‘‘పంచాయతీలను నాలుగు గ్రేడులుగా విభజించి జోన్ల వారిగా క్యాడరును నియమించాలి. జూనియర్ పంచాయతీ కార్యదర్శుల నియామకతేదీ 2019, ఏప్రిల్ 12 నుంచి సర్వీసును లెక్కిస్తూ క్రమబద్ధీకరణ కాలాన్ని నాలుగేళ్ల నుంచి రెండేళ్లకు తగ్గించి ప్రొబేషన్ ను నిర్ధారించాలి. వారి సర్వీసు కాలాన్ని పరిగణనలోకి తీసుకొని న్యాయం చేకూర్చాలి. ప్రస్తుతం అవుట్ సోర్సింగులో పనిచేస్తున్న 1039 మంది ఓపీఎస్ లను జేపీఎస్ లుగా గుర్తించాలి. పంచాయతీరాజ్ చట్టం 2018లో కార్యదర్శులకు ఇబ్బందిగా ఉన్న కొన్ని సెక్షన్లలో మార్పులు చేయాలి. జీవో 317 ద్వారా నష్టపోయిన కార్యదర్శులను తిరిగి వారి సొంత జిల్లా/జోన్లకు పంపించాలి. పంచాయతీల్లో జనాభా ప్రాతిపదికన సిబ్బందిని కేటాయించి ప్రస్తుతం పురపాలక సంఘాల్లోని విధానాన్ని ఇక్కడా అనుసరించాలి. పంచాయతీ కార్యాలయాలకు ట్యాబ్ , సిమ్, అంతర్జాలం వంటి సదుపాయాలను కల్పించాలి. ఉద్యోగులు అందరికి పాత పెన్షన్ విధానాన్ని అమలు చేయాలి. ఉపాధి పనుల బాధ్యతలను కార్యదర్శులకు అప్పగించకుండా ఖాళీలు ఉన్నచోట ఫీల్డు అసిస్టెంట్లను నియమించాలి. తెలంగాణ పంచాయతీ కార్యదర్శుల సంఘానికి ప్రభుత్వ గుర్తింపు ఉన్నందున నాయకులకు ఓడీ సౌకర్యాన్ని అందుబాటులోకి తేవాలి. సంఘ కార్యాలయం కోసం హైదరాబాదులో భవనం, జిల్లాల్లోని ఐడాక్ లో వసతి సదుపాయం కల్పించాలి’’ అని వినతి పత్రంలో వివరించారు.