బురుజు.కాం Buruju.com : Hyderabad: లంకకు వారథిని నిర్మించేటప్పుడు ఒక ఉడత కూడ ఇసుక రేణువులను, చిన్నపాటి రాళ్లను మోస్తూ రాముడిపై తనకు గల భక్తిని చాటుకొంది. అయోధ్య ఆలయంలో బాలక్ రాముడి ప్రాణ ప్రతిష్ఠ క్రతువు అనంతరం ప్రధాన మంత్రి మోదీ మాట్లాడుతూ.. రామాయణంలోని ఉడతతో సహా నాలుగు పాత్రలను ప్రముఖంగా ప్రస్తావించి వాటికి మల్లే ప్రతి ఒక్కరు తమ శక్తి సామర్ధ్యాలకు అనుగుణంగా దేశానికి సాయపడాలని ఉద్భోదించారు. ఆయన చాలా వర్ణిస్తూ చెప్పిన ‘ఉడత’ పాత్రను రామాయణంలోకి జొప్పించింది తెలుగు కవి గోన బుద్ద రాజు. వాల్మీకి రాసిన మూల రామాయణంలో ఉడత ప్రసక్తి లేనేలేదని చరిత్రకారులు, కవి ఆరుద్ర 35 ఏళ్ల క్రితం తేల్చిచెప్పారు. కేవలం 680 ఏళ్ల క్రితం తెలుగు కవి రాసిన ఉడతా భక్తిని వాల్మీకి రామాయణంలోని అంశంగా మోదీతో సహా రామభక్తులంతా విశ్వసించటం తెలుగు వారంతా గర్వపడే విషయం. దీనిపై Buruju.com అందిస్తున్న ప్రత్యేక కథనం ఇది.

1) రంగనాథ రామాయణాన్ని రాసిన గోన బుద్ధ రాజు ఊహా చిత్రం. ఈయన్ని బుద్ధ రాజు అని ఆరుద్ర పేర్కొనగా గోన గన్నా రెడ్డి మనవుడు కనుక గోన బుద్ధా రెడ్డిగాను వ్యవహారంలో ఉన్నారు (2) గోన బుద్దరాజు రాసిన రంగనాథ రామాయాన్ని తెలుగు అకాడమి కూడా ముద్రించింది

రామాయణ సంఘటనలు ఇప్పటికి 4,500 సంవత్సరాల క్రితం చోటు చేసుకొన్నట్టుగా ప్రఖ్యాత చరిత్రకారులు సురవరం ప్రతాప రెడ్డి తన ‘రామాయణ విశేషములు’ గ్రంథంలో విశ్లేషించారు. రామాయణాన్ని తొలుత వాల్మీకి రాసిన తర్వాత పలువురు దానిని తమదైన శైలిలో తిరగరాస్తూ కొన్ని కొత్త అంశాలను కూడా జోడిస్తూ వచ్చారు. అలా తెలంగాణకు చెందిన గోన బుద్ధ రాజు ( Gona Buddha Reddy ) అనే ప్రభువు ఇప్పటికి 680 సంవత్సరాల క్రితం ‘రంగనాథ రామాయణం’ రాసి దానిలో వాల్మీకి రాయని లక్ష్మణ రేఖ, ఉడత సాయం సంఘటనలను చేర్చారు. రాణి రుద్రమదేవికి చేదోడువాదోడుగా ఉంటూ తెలంగాణలో వర్ధమానపురం సామంత రాజుగా ఉన్న గోన గన్నారెడ్డి మనవడే గోన బుద్ధరాజు. ఆయన రాసిన రామాయణం విశేషంగా ప్రాచుర్యం పొందింది.

(1) ప్రఖ్యాత కవి, చరిత్రకారులు ఆరుద్ర (2) ఆయన రాసిన సమగ్రాంధ్ర సాహిత్యం మొదటి భాగం గ్రంథం. ఉడత ఉదంతం రంగనాథ రామాయణంలో మాత్రమే ఉన్నట్టుగా ఇదే గ్రంథంలో ఆయన వెల్లడించారు

కొందరు రచయితలు రాసిన రామాయణాలను వాల్మీకి రామాయణంతో ఆరుద్ర Arudra సరిపోల్చి వాటిలోని తేడాలను 1988లో ప్రచురించిన తన ‘సమగ్రాంధ్ర సాహిత్యం’ మొదటి భాగంలో వెల్లడించారు. వాల్మీకి రామాయణం మూలంలో లేని ఉడత ఘట్టాన్ని మొదటి సారిగా గ్రంథస్తం చేసింది గోన బద్ధరాజు అని ఆయన స్పష్టం చేశారు. పాడుకోవటానికి వీలైన ద్విపద చందస్సులో ఈయన రామకథను చెప్పాడని, దీనిని క్రీ.శ 1340 ప్రాంతంలో రాసి ఉండొచ్చని కొన్ని చారిత్రక ఆధారాలతో ఆరుద్ర అంచనా వేశారు. ‘‘ చిత్త శుద్ధితో, ప్రేమతో చేసిన ఎటువంటి సేవనైనా తెలుగు వాళ్లం ‘ఉడతా భక్తి’ అంటాం. ఇది తెలుగు జాతీయం. సేతువు కడుతున్నప్పుడు రాముల వారికి తోడ్పడిన ఉడత పూర్తిగా తెనుగుదే’’ అని ఆరుద్ర పేర్కొన్నారు.

రాముడి చేతిలో ఉడత

రామాయణంలోని శబరి, గుహుడు, ఉడత, జటాయువు పాత్రలు అందరికీ ఆదర్శ ప్రాయమైనవని ప్రధాన మంత్రి మోదీ Prime Minister Modi .. జనవరి 22వ తేదీన అయోధ్యలో Ayodhya బాలక్ రాముడి Baalak Ram విగ్రహ ప్రతిష్ఠాపన క్రతువు అనంతరం తన ప్రసంగంలో పేర్కొన్నారు. వానర సైన్యం లంకకు బండ రాళ్లతో వారథిని నిర్మిస్తున్నప్పుడు ఉడత తనవంతుగా చిన్నచిన్న రాళ్లను నోట కరచి వాటి మధ్యలో వేసిందని, ఉడత సాయాన్ని వానరాలు వెక్కిరించగా దశరథ నందుడు మాత్రం ముగ్ధుడయ్యాడని పేర్కొన్నారు. ‘‘ బలవంతుడు, బలహీనుడు అని కాకుండా చేస్తున్న సాయాన్ని మాత్రమే చూడాలని వానరాలకు రాముడు ఉపదేశించాడు. ఉడత వెన్నును తన చేతితో నిమిరాడు. ఆ స్పర్శతోనే ఉడత వీపు భాగంలో చారలు ఏర్పడ్డాయని చెబుతుంటారు. ఈ కథను ప్రతి ఒక్కరూ స్పూర్తిగా తీసుకోవాలి. నాతో ఏమవుతుందిలే అనే భావనను విడనాడి ఉడతను చూసి నేర్చుకోవాలి. చిన్నదా, పెద్దదా అని కాకుండా భారత్ ను ఉన్నత స్థానంలో నిలబెట్టేందుకు తన వంతుగా ఏం చేయగలమో అది చేయాలి’’ అని మోదీ ఉద్భోదించారు. ప్రదాని మోదీ చెప్పిన ఉడత విషయాలను అయోధ్యకు వచ్చిన ప్రముఖులు, సామాజిక మాధ్యమాల ద్వారా విగ్రహావిష్కరణ కార్యక్రమాన్ని తిలకించిన ప్రజలు శ్రద్ధగా విన్నారు. తెలుగు కవి గోన బుద్దరాజు (గోన బుద్ధా రెడ్డి) మరో సారి ధన్యుడయ్యాడు.