బురుజు.కాం Buruju.com: షాజహాన్, ముంతాజ్ ల అద్భుత అజరామర ప్రేమకు చలువరాతి తాజమహల్ Tajmahal ఒక ప్రత్యక్ష సాక్ష్యం. వారిద్దరు ఒకరిని వదిలి మరొకరు ఉండేవారు కాదని, షాజహాన్ ఎక్కడికి వెళ్లినా అతని వెంట ముంతాజ్ కూడా ఉండేదని చెప్పటానికి ఆంధ్రప్రదేశ్ లోని మచిలీపట్నం(బందరు) Machilipatnam మరో సాక్ష్యంగా నిలుస్తోంది. ఇప్పటికి 4వందల ఏళ్ల క్రితం.. 1622, అక్టోబరు 12వ తేదీన షాజహాన్, ముంతాజ్ లు మచిలీపట్నం వచ్చి అక్కడి నుంచి సముద్ర మార్గాన పయనించి ఆగ్రాకు చేరుకొన్నారు. నాటి చరిత్రకారుల రికార్డుల్లో వారి పర్యటనకు దారితీసిన పరిస్థితులు లిఖించి ఉన్నప్పటికీ అవి అంతగా ప్రచారంలోకి రాలేదు.

షాజహాన్, ముంతాజ్ ల ప్రణయ స్మారక చిహ్నం తాజమహల్

మెుఘల్ పాలకుడు షాజహాన్ Shajhahan తన భార్య ముంతాజ్ Muntaz తో కలిసి డెక్కన్ లో పర్యటిస్తున్న సమయంలోనే అతని తండ్రి జహంగీర్ చనిపోయాడు. వెంటనే దిల్లీకి వెళ్లేందుకు షాజహాన్ సన్నిద్దులవ్వగా దారిలో మధ్యప్రదేశ్ లో అడ్డుగా అతని సోదరుడి సైన్యం ఉన్నట్టు వేగుల ద్వారా తెలిసింది. అప్పటికే దిల్లీ సింహాసనం కోసం సోదరుల మధ్య అంతర్యుద్ధం కొనసాగుతోంది. ఇటువంటి పరిస్థితుల్లో గోల్కొండ సుల్తాన్ మహ్మద్ కుతుబ్ షా సాయంతో షాజహాన్, ముంతాజ్ బేగంలు గోల్కొండ మీదగా మచిలీపట్నం వెళ్లారు. అక్కడి నుంచి ఓడపై ఒరిస్సా, బెంగాల్ మీదగా ఆగ్రాకు చేరుకొన్నారు. వీరిద్దరి పర్యటన వివరాలను నాటి చరిత్రకారుల రికార్డుల ఆధారంగా ఏటకూరు బలరామమూర్తి తన ‘మన చరిత్ర’ గ్రంధంలో వివరించారు. మచిలీపట్నం సందర్శన తేదీనీ ఆయన వెల్లడించారు.

తాజమహల్ లో షాజహాన్, ముంతాజ్ ల సమాధులు

మచిలీపట్నం నుంచి షాజహాన్ వెళ్లేందుకు కుతుబ్ షా Qutub Shah తొలుత అంగీకరించలేదని, అప్పటికే షాజహాన్ తన తండ్రి జహంగీరుపై తిరుగుబాటు చేసి ఉండటమే ఇందుకు కారణమని బి.ఎస్.ఎల్. హనుమంతరావు తన ‘ఆంధ్రుల చరిత్ర’ గ్రంధంలో తెలిపారు. ఆ తర్వాత మనస్సు మార్చుకొని షాజహాన్ ను గోల్కొండ, మచిలీపట్నం మీదగా వెళ్లేందుకు ఒప్పుకోవటమే కాకుండా ప్రయాణంలో అవసరమయ్యే ధన ధాన్యాల సాయం చేయాల్సిందిగా సిబ్బందిని ఆదేశించినట్టుగా ‘ఇక్బల్ నామా జహంగీరి’ తదితర గ్రంధాల ఆధారంగా ఆయన వెల్లడించారు. కుతుబ్ షాహీల కాలంలో మచిలీపట్నంలో గొప్ప నౌకా దళం ఒకటి ఎల్లవేళలా సిద్దంగా ఉండేదని భావరాజు వెంకట కృష్ణారావు 1923లో రాసిన ‘ ప్రాచీనాంధ్ర నౌకాజీవనము’ అనే గ్రంధంలో తెలిపారు. మక్కామదీనా తదితర తీర్ధయాత్రలకు మచిలీపట్నం తీరం నుంచి వెళ్లేవారని, వారికి నౌకా దళం సాయపడేదని పేర్కొన్నారు.

ముంతాజ్

షాజహాన్ ,ముంతాజ్ లు 1622లో మచిలీపట్నం రాగా మరో పదేళ్లకు.. 1632లో తాజమహల్ నిర్మాణం మొదలయ్యింది. అంటే మచిలీట్నం నుంచి వెళ్లిన పదేళ్లకే ముంతాజ్ చనిపోయింది. అప్పటికి వారికి వివాహమయ్యి 17 ఏళ్లు. అంటే పెళ్లయిన ఏడేళ్లకు ఆమె భర్తతో కలిసి గోల్కొండ, మచిలీపట్నాలకు వచ్చింది. అప్పటికి షాజహాన్ కు 30 ఏళ్లు. షాజహాన్ కు నలుగురు కుమారులతో సహా మొత్తం 18 మంది పిల్లలు ఉండగా వారిలో 14 మందిని ఆయన ముంతాజ్ ద్వారానే కన్నారు. పుత్రుల్లో ఒకడైన ఔరంగ జేబు.. తండ్రిని ఆగ్రా కోటలో ఖైదు చేసి సింహాసనాన్ని కైవశం చేసుకొన్నాడు. ఆగ్రా కోటలోని తన బంధీఖానా కిటికీ నుంచే షాజహాన్ నిత్యం తాజమహల్ ను చూస్తూ ముంతాజ్ ను తలచుకొని కుమిలిపోయేవాడు. చివరికి ఆయన 1666లో తన 74వ ఏట చనిపోగా తాజమహల్ లోనే ముంతాజ్ సమాధి పక్కన అతన్నీ సమాధి చేశారు.