బురుజు.కాం Buruju.com : Hyderabad: తెలుగు రాష్ట్రాల్లోని ఇక ఎవరి వద్దనైనా రెండు వేల రూపాయల నోట్లు కనుక ఉన్నట్లైతే వాటిని పట్టుకొని ఇక హైదరాబాదుకు రావాల్సివుంటుంది. ఇక్కడి రిజర్వు బ్యాంకు (RBI) ప్రాంతీయ కార్యాలయం ద్వారా వాటిని తమ ఖాతాల్లోకి పంపుకోవచ్చు. ఇక్కడ తప్ప మరే ఇతర బ్యాంకుల్లోను నోట్లను డిపాజిట్ చేయటానికి అక్టోబరు 8వ తేదీ నుంచి ఇక వీలుకాదు. వాటిని బ్యాంకులు స్వీకరించవు. మరో వైపు.. రెండు వేల రూపాయల నోట్లు ఇప్పట్లో రద్దు కావు. ముద్రణ అంటూ ఉండదు కనుక అవి అందుబాటులో మాత్రం ఉండవు.

ఓట్ల కొనుగోలుకు, నల్ల ధనాన్ని దాచుకోవటానికి పెద్ద నోట్లు అనువుగా ఉన్నందునే వాటిని చెలామణీ నుంచి ఉపసంహరించారనే వాదన ఉంది

పెద్ద నోటును చెలామణి నుంచి వెనక్కి తీసుకొంటున్నట్టుగా ఆర్బీఐ 2023, మే 19వ తేదీన ప్రకటించింది. ఆ రోజుకు చెలామణీలో ఉన్న పెద్ద నోట్ల విలువ రూ.3.56 లక్షల కోట్లు. ఆర్బీఐ ప్రకటనతో వ్యాపార లావాదేవీల్లో రూ.2వేల నోటు స్థానం కనుమరుగవుతూ వచ్చింది. ప్రజల వద్ద గల నోట్లు బ్యాంకులకు చేరుతూ వచ్చాయి. ఇలా సెప్టెంబరు 29వ తేదీ నాటికి రూ. 3.42 లక్షల కోట్ల ( 96 శాతం) విలువైన నోట్లు బ్యాంకులకు తిరిగి చేరాయి. అంటే.. ఇక రూ.14 వేల కోట్ల (4 శాతం)విలువైన నోట్లు మాత్రం ఆయా వర్గాల వారి వద్ద మిగిలి ఉన్నాయి. దేశంలోని ఏ బ్యాంకు బ్రాంచిలోనైనా సరే రూ.2వేల నోట్లను డిపాజిట్ చేసుకోవటానికి లేదా మార్చు కోవటానికి ఆర్.బి.ఐ సెప్టెంబరు 30వ తేదీ వరకు అనుమతి ఇచ్చింది. తాజాగా ఇటువంటి గడువును మరో వారం రోజులు.. అంటే అక్టోబరు 7వ తేదీ వరకు పొడిగించి 8వ తేదీ నుంచి వాటిని ఏ రీతిలో తీసుకొనేది వెల్లడించింది.

హైదరాబాదులోని ఆర్.బి.ఐ ప్రాంతీయ కార్యాలయ భవనం

తాజా ఉత్తర్వుల ప్రకారం.. రూ.2వేల నోట్లను అక్టోబరు 8వ తేదీ నుంచి బ్యాంకులు తీసుకోవు. దేశ వ్యాప్తంగా ఆర్.బి.ఐ కి గల 19 ప్రాంతీయ కార్యాలయాలు ఆయా వ్యక్తులు , సంస్థల నుంచి విడతకు రూ.20వేల విలువల గల నోట్లను మాత్రం తీసుకొంటాయి. తదుపరి ఉత్తర్వులు వెలువడే వరకు ఇక్కడ నోట్లను స్వీకరిస్తారు. నోట్లను ఇచ్చేటప్పుడు ఆర్.బి.ఐ అధికారులు అడిగే గుర్తింపు పత్రాలను చూపించాల్సివుంటుంది. ఇక్కడ నోట్లను తీసుకొని ఆయా వ్యక్తులు, సంస్థల బ్యాంకు ఖాతాల్లోకి పంపటమే తప్ప వాటికి బదులుగా తిరిగి చిన్ననోట్లను ఇవ్వటమనేది ఉండదు. దర్యాప్తు సంస్థలకు మాత్రం రూ.2వేల నోట్లను ఎప్పుడైనా సరే ఈ ప్రాంతీయ కార్యాలయాల్లో మార్పిడి చేసుకోవటానికి అవకాశం ఉంటుంది. ఉభయ తెలుగు రాష్ట్రాలకు సంబంధించిన ఆర్.బి.ఐ ప్రాంతీయ కార్యాలయం హైదరాబాదులో మాత్రమే ఉన్నందున ఇక నోట్లను డిపాజిట్ చేసుకోదలచిన వారు హైదరాబాదుకు రావాల్సివుంటుంది. ఇంత దూరం రాలేనివారు అవసరమైన పత్రాలతో పోస్టు ద్వారా పంపుకొనే వెసులుబాటును ఆర్బీఐ కల్పించింది.