బురుజు.కాం Buruju.com : Hyderabad: రాంబాబు ఇంటిలో అతని తాత రాసి పెట్టిన వంశ వృక్షం ఇటీవల బయటపడింది. దానిలో ఏకంగా రాంబాబుకు ముందటి తొమ్మిది తరాల వారి పేర్లు ఉన్నాయి. అతని తండ్రి పుట్టిన సంవత్సరం తప్ప మిగతా ముందటి తరాల వారు జీవించిన కాలాలు మాత్రం దానిలో లేవు. తన తండ్రికి ముందటి తరాల వారు సుమారుగా ఏయే సంవత్సరాల్లో జీవించి ఉండొచ్చో తెలుసుకోవాలనే జిజ్ఞాస రాంబాబులో నెలకొంది. ఇటీవల ఆయన చరిత్ర పరిశోధకులను సంప్రదిస్తే వారు ఒక సూత్రీకరణను చెప్పారు. దాని ప్రకారం.. రాంబాబుకు ముందటి తొమ్మిదో తరం ముత్తాత జీవించిన కాలం దాదాపుగా 1724 వ సంవత్సరం. అప్పటికి బ్రిటీష్ వారు తెలుగు ప్రాంతాల్లో వ్యాపారం చేసుకొంటున్నారే తప్ప పాలన పగ్గాలను మాత్రం చేపట్టలేదు. ఆసక్తిని కలిగించే ఇటువంటి సూత్రీకరణను ప్రఖ్యాత రచయిత ఆరుద్ర తన ‘సమగ్ర ఆంధ్ర సాహిత్యం ’ గ్రంథంలోను వెల్లడించారు. ఇది Buruju.com పాఠకులకు తప్పక ఆసక్తిని కలిగిస్తుంది.

ప్రఖ్యాత నటులు, మాజీ ముఖ్యమంత్రి ఎన్టీఆర్ వంశవృక్షం ఇది

రాజుల కాలాలను అంచనా వేసేందుకు చరిత్ర పరిశోధకులు ఒక్కో తరానికి 30 సంవత్సరాల చొప్పున లెక్కిస్తారు. ఇలా రాంబాబుతో సహా పది తరాలకు తరానికి 30 ఏళ్ల చొప్పున పరిగణనలోకి తీసుకుంటే అది 300 ఏళ్లు ( 10x30=300) అవుతుంది. దానిని ప్రస్తుత 2024 నుంచి తీసివేస్తే 1724 వస్తుంది. ఇటువంటి లెక్కతోనే ప్రఖ్యాత పోతులూరి వీరబ్రహ్మం గారు జీవ సమాధి అయిన సంవత్సరాన్ని ఆరుద్ర తన ‘ సమగ్ర ఆంధ్ర సాహిత్యం’ మూడో సంపుటిలో అంచనా వేశారు.

పోతులూరి వీరబ్రహ్మంగారి విగ్రహం

కాలజ్ఞానాన్ని రాసిన బ్రహ్మంగారికి అయిదుగురు కుమారులు, ఒక కుమార్తె ఉన్నారు. కుమార్తె వీర నారాయణమ్మ మనుమడి మనుమడు పేరు వెంకటేశ్వర స్వామి. ఆయన 1932లో చనిపోయారు. బ్రహ్మంగారికి ఇతను ఆరో తరం వాడు. తరానికి 30 ఏళ్ల కొలమానం ప్రకారం ఆరుద్ర లెక్కలు వేశారు. ‘‘ దీని ప్రకారం బ్రహ్మంగారు సమాధి అయిన సంవత్సరం క్రీ.శ.1752 కావచ్చు.. లేదా మరో తరం వరకు కూడా ఆయన జీవించి ఉండొచ్చు’’ అని ఆయన పేర్కొన్నారు. కుంఫణి (బ్రిటీష్) ప్రారంభ దినాల్లో బ్రహ్మంగారు బతికే ఉన్నారని, తత్వాలను రాశారని భావించవచ్చని ఆరుద్ర అభిప్రాయపడ్డారు. ఖచ్చితమైన ఆధారాలంటూ లేకపోవటంతో బ్రహ్మంగారి జనన, మరణ సంవత్సరాలపై రకరకాల వాదనలు ఉన్నాయి. ఆయన జీవ సమాధి పొందింది క్రీ.శ. 1693గా కడప జిల్లాలో ఆయన నివసించిన ఇంటి వద్ద ఏర్పాటు చేసిన బోర్డులో ఇటీవల రాసినప్పటికీ చరిత్ర పరిశోధకుల కొలమానాన్ని బట్టి చూస్తే అది సరైన సంవత్సరం కానే కాదు. తాను పేర్కొన్న లెక్కతో బ్రహ్మంగారి కాల నిర్ణయం చాలా సులభంగానే తేలుతుందని ఆరుద్ర కితాబు కూడా ఇచ్చారు.

తరానికి 30 ఏళ్ల చొప్పున అంచనా వేసుకొని ఆయా కాలాల్లోని పరిస్థితులను కనుక శోధిస్తే ఆయా వంశాలకు చెందిన పూర్వపు చరిత్ర సైతం వెల్లడయ్యే అవకాశాలు లేకపోలేదు. ఒక్కో సారి ఆశ్చర్యపర్చే సంగతులూ బహిర్గతం కావచ్చు. ఉమ్మడి కుటుంబ వ్యవస్థ విచ్చిన్నం తర్వాత వంశ వృక్షాలను రాయటం క్రమేణా అంతరించిపోతోంది. ఇటువంటి సంస్కృతిని ఉభయ తెలుగు రాష్ట్రాల వారు పునరుద్ధరించుకోవాల్సిన అవసరం ఎంతైనా ఉంది. అప్పుడే భవిష్యత్తు తరాల వారికి ఇప్పటి తరాల వారి విషయాలు అవగతమవుతాయి ( ఈ లింకును దయచేసి మీ బంధువులకు, మిత్రులకు షేర్ చేయండి)